Special Kadala Curry Recipe:കേരളത്തിലെ ആളുകൾക്ക് ഏറ്റവും ജനപ്രിയമായ ഒരു കറിയാണ് കടലക്കറി എന്നത്. ഇത് സാധാരണയായി അപ്പം, പുട്ട്, ഇടിയപ്പം അല്ലെങ്കിൽ ചോറ് എന്നിവയ്‌ക്കൊപ്പം ഒരു സൈഡ് വിഭവമായി ആളുകൾ ഇഷ്ടപെടുന്നു. കടലക്കറി നമ്മുക്ക് പല തരത്തിലായി ഉണ്ടാക്കാൻ പറ്റും. എന്നും ഉണ്ടാക്കുന്നതിൽ നിന്നും വ്യത്യസ്തമായ രുചികൾ ഇഷ്ടപ്പെടുന്നവർ ഈ റെസിപ്പി ഇഷ്ടപെടും എന്നതിൽ ഉറപ്പാണ്. അപ്പോൾ ഉണ്ടാക്കാൻ വളരെ എളുപ്പവും രുചി ഇരട്ടിയുമായ കിടിലൻ കടലക്കറിയുടെ റെസിപ്പി നമ്മുക്ക് നോക്കിയാലോ…

ആവശ്യമായ ചേരുവകൾ :

കടല – 1 കപ്പ്
സവാള (നന്നായി അരിഞ്ഞത്) – 1 ഇടത്തരം
തക്കാളി (അരിഞ്ഞത്) – 1
ഇഞ്ചി-വെളുത്തുള്ളി പേസ്റ്റ് – 1 ടീസ്പൂൺ
പച്ചമുളക് – 2
കറിവേപ്പില – കുറച്ച്
മഞ്ഞൾ പൊടി – ½ ടീസ്പൂൺ
ചുവന്ന മുളക് പൊടി – 1 ടീസ്പൂൺ
മല്ലിപ്പൊടി – 1 ടീസ്പൂൺ
ഗരം മസാല – 1 ടീസ്പൂൺ
ഉപ്പ് – പാകത്തിന്
തേങ്ങാപ്പാൽ (ഓപ്ഷണൽ) – ½ കപ്പ്
വെള്ളം – ആവശ്യത്തിന്
വെളിച്ചെണ്ണ – 2 ടീസ്പൂൺ

പൊടിക്കാൻ ആവശ്യമായവ :

തേങ്ങ ചിരകിയത് – ¼ കപ്പ്
ജീരകം – ½ ടീസ്പൂൺ
പെരുംജീരകം – ½ ടീസ്പൂൺ
ഉണങ്ങിയ ചുവന്ന മുളക് – 2

തയ്യാറാക്കുന്ന വിധം

കടലകറി ഉണ്ടാക്കുന്നതിന് ആദ്യം തന്നെ കടല രാത്രി മുഴുവൻ അല്ലെങ്കിൽ കുറഞ്ഞത് 6-8 മണിക്കൂർ വെള്ളത്തിൽ ഇട്ട് കുതിർക്കുക. പാചകം ചെയ്യുന്നതിനുമുമ്പ് ആ വെള്ളം കളയുക. ശേഷം ഒരു പാനിൽ , തേങ്ങ ചിരകിയത്, ജീരകം, പെരുംജീരകം, ഉണങ്ങിയ ചുവന്ന മുളക് എന്നിവ സ്വർണ്ണ തവിട്ട് നിറമാകുന്നതുവരെ വറുത്തെടുക്കുക. ഇവ ചൂട് മാറിയതിനു ശേഷം കുറച്ചു വെള്ളം ചേർത്ത് അരച്ചെടുക്കണം. ഇനി ഒരു പ്രഷർ കുക്കറിൽ, കുതിർത്തു വച്ചിരിക്കുന്ന കടല, ആവശ്യത്തിന് വെള്ളം, ഒരു നുള്ള് മഞ്ഞൾപ്പൊടി എന്നിവ ചേർത്ത് ഏകദേശം 3-4 വിസിൽ വരേക്കു വേവിക്കുക.

Special Kadala Curry Recipe

അടുത്തതായി ഒരു പാനിൽ വെളിച്ചെണ്ണ ചൂടാക്കി അരിഞ്ഞ ഉള്ളി ചേർക്കുക. ഗോൾഡൻ ബ്രൗൺ നിറമാകുന്നത് വരെ വഴറ്റുക. ഇഞ്ചി-വെളുത്തുള്ളി പേസ്റ്റ്, അരിഞ്ഞ പച്ചമുളക്, കറിവേപ്പില എന്നിവ ചേർക്കുക. ഇവയും ഏകദേശം 2 മിനിറ്റ് വഴറ്റുക. അരിഞ്ഞ തക്കാളി ചേർത്ത് മൃദുവാകുകയും എണ്ണ തെളിഞ്ഞ് വരുന്നത് വരെയും വേവിക്കുക. ശേഷം മുളകുപൊടി, മല്ലിപ്പൊടി, ഗരം മസാല എന്നിവ ചേർത്ത് നന്നായി ഇളക്കുക. ഇനി ഇതിലേക്ക് ആദ്യം അരച്ച് വെച്ചിരിക്കുന്ന തേങ്ങയുടെ അരപ്പ് ചേർത്ത് നന്നായി ഇളകി യോജിപ്പിക്കാം. ശേഷം വേവിച്ച് വെച്ചിരിക്കുന്ന കടല ചേർത്ത് ആവശ്യത്തിന് ഉപ്പും ചേർത്ത് ഇളക്കിയെടുത്താൽ സ്വാദിഷ്ടമായ കടല കറി തയ്യാർ. ഈ റെസിപ്പിയെ പറ്റി കൂടുതൽ അറിയാൻ വിഡിയോ കാണൂ… Video Credits : Kannur kitchen